काठमाडौं । भारतको ओडिसास्थित कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी) मा मृत भेटिएकी नेपाली छात्रा प्रकृति लम्सालको शव आज नेपाल ल्याउने तयारी गरिएको छ।
परिवारका अनुसार, नेपालस्थित भारतीय दूतावास, स्थानीय प्रशासन, सुरक्षाकर्मी र कलेज प्रशासनसँगको समन्वयपछि शव नेपाल ल्याउन प्रक्रिया अघि बढाइएको छ। शव आज साँझसम्म बुटवलस्थित उनको परिवारको घर पुर्याइनेछ।
नेपाली विद्यार्थीमाथि आक्रमणपछि कलेज प्रशासनको आलोचना
गत आइतबार प्रकृति कलेजको होस्टलमा मृत अवस्थामा भेटिएकी थिइन्। उनको मृत्यु शङ्कास्पद रहेको भन्दै नेपाली विद्यार्थीहरूले विश्वविद्यालय परिसरमा न्यायको माग गर्दै विरोध प्रदर्शन गरेका थिए। तर, युनिभर्सिटी प्रशासनले उल्टै विद्यार्थीहरूमाथि आक्रमण र दुर्व्यवहार गरेको आरोप लागेको छ।
घटनापछि चर्को आलोचना भएपछि कलेज प्रशासनले केही कर्मचारीलाई बर्खास्त गर्नुका साथै केहीलाई निलम्बन गरेको छ। साथै, कलेजका प्राध्यापकहरू नेपाली विद्यार्थीलाई धम्क्याएको घटनाबारे माफी माग्न बाध्य भएका छन्।
ब्ल्याकमेल आरोपमा एक विद्यार्थी पक्राउ
प्रकृति लम्सालको मृत्युमा कलेजकै अड्विक श्रीवास्तवको संलग्नता रहेको आशंका गरिएको छ। उनलाई भारतीय प्रहरीले पक्राउ गरी अनुसन्धान अघि बढाएको छ। ब्ल्याकमेलिंगको कारणले नै प्रकृतिले ज्यान गुमाएको हुनसक्ने आशंका गरिएको छ।
यस घटनाले भारतमा अध्ययनरत नेपाली विद्यार्थीहरूको सुरक्षाका विषयमा गम्भीर प्रश्न उठाएको छ। अब नेपाली पक्षले यो घटनाबारे थप अनुसन्धान र न्यायिक प्रक्रिया अघि बढाउने वा कूटनीतिक पहल गर्ने भन्ने चासो बढेको छ।
