काठमाडौँ । हिमालय एयरलाइन्सले चैतको १८ गतेदेखि पोखरा–ल्हासा उडान सञ्चालन गर्ने भएको छ। हिमालय एयरलाइन्सका प्रवक्ता विजय श्रेष्ठका अनुसार सुरुवाती चरणमा साताको एउटामात्र उडान गर्ने तयारी छ।
मागअनुसार उडान क्रमशः वृद्धि गर्ने बताउँदै प्रवक्ता श्रेष्ठले हिमालय एयरलाइन्सको मुख्य उद्देश्य चीनका विभिन्न १० पर्यटकीय क्षेत्रमा उडान भर्ने र नेपालमा वार्षिक १० लाख चिनियाँ पर्यटक भित्र्याउने रहेको दाबी गरे।
पोखरा ल्हासाको पहिलो उडानमा पोखरा महानगरपालिकाको अगुवाइमा पर्यटन व्यवसायीसहित विभिन्न क्षेत्रका १२७ जनाले उडान भर्नेछन् भने चीनबाट करिब एक हजार पर्यटक पोखरा आउने तयारी छ।
अन्तर्राष्ट्रिय विमानस्थल सञ्चालनमा आएको दुई वर्ष पूरा हुँदा समेत व्यावसायिक उडान नहुँदा पर्यटकीय नगरी पोखराका व्यवसायी चिन्तित थिए।
चिनियाँ पर्यटकलाई नेपाल भित्र्याउने उद्देश्यसहित उडान सुरु गर्न लागेको हिमालय एयरलाइन्सले स्पष्ट पारेको छ। यस्तो अवस्थामा हिमालय एयरलाइन्सले पोखरा–ल्हासा उडान सञ्चालन गर्दा चिनियाँ पर्यटक भित्रिने आशा जागेको व्यवसायीहरूको प्रतिक्रिया छ।
होटेल सङ्घका केन्द्रीय सदस्य भरतराज पराजुलीले पोखरालाई अन्तर्राष्ट्रिय पर्यटन केन्द्रका रूपमा स्थापित गर्न महत्त्वपूर्ण भूमिका खेल्ने विश्वास व्यक्त गरे।
नेपाल पर्यटन बोर्ड गण्डकीका प्रमुख मणिराज लामिछानेले नेपाल–चीनबीचको पर्यटन सम्बन्धलाई मजबुत बनाउने र चिनियाँ पर्यटकलाई सहज यात्रा अनुभव प्रदान गर्न यो उडान फलदायी हुने उल्लेख गरे।
सन् २०१९ मा एक लाख ६९ हजार ५४३ चिनियाँ पर्यटक नेपाल आएका थिए। कोभिड महामारीपछि उक्त सङ्ख्या घटे पनि पछिल्लो समय सुधार हुँदै गएको छ। २०२३ मा करिब एक लाख चिनियाँ पर्यटक नेपाल आएका थिए।
